El comisario xefe da Brigada de Investigación Tecnolóxica do Corpo Nacional de Policía, Manuel Vázquez, advertiu onte nunacto celebrado no Club Financeiro que o seu departamento está a detectar un aumento de delitos informáticos, entre os que predominan a fraude, así como tamén un repunte nas denuncias por ciberacoso.

Vázquez, que participou na xornada "Seguridade na información", explicou que a maior parte dos delitos que se cometen a través deinternet "son os clásicos", en alusión aos que teñen un móbil económico.

O comisario xefe diferenciou entre tres tipos de fraudes: os relacionados co uso de tarxetas de crédito para adquirir diversos bens, os que teñen que ver con operacións de compravenda a través de internet, e os casos de phising, onde os delincuentes conseguen as claves de contas bancarias.

En canto aos casos de acoso na rede, Manuel Vázquez asegurou que a Policía Nacional está a constatar tamén un incremento de denuncias por este motivo, como por exemplo o ciberbullying ou mesmo o grooming. Acerca desta última modalidade, Vázquez alertou de que se trata dun "acoso a menores con intencionalidade sexual" que se realiza a través do messenger para captar, por exemplo, imaxes de tipo pornográfico.

En relación á pornografía infantil, outro dos delitos frecuentes no ámbito informático, o comisario xefe da Brigada de Investigación Tecnolóxica do Corpo Nacional de Policía explicou que se ben as prácticas de pedofilia "existiron sempre", agora se aproveita o anonimato que "brinda o ordenador" para acceder e mesmo compartir ese tipo de contidos.

Delitos a menores

A este respecto, destacou que "é bo" que transcendan as operacións contra a pornografía infantil en internet, nas que adoitan rexistrarse un elevado número de detidos, porque trasladan á opinión pública a conciencia de que se trata dun delito grave". En todo caso, recordou que o fin último é "liberar" os menores que poidan estar a sufrir este tipo de abuso.

En relación ás vítimas, o comisario xefe indicou que en España non se ten coñecemento de demasiados casos dado que, da análise das imaxes analizadas, se desprende que a maior parte dos nenos e adolescentes están noutros países.

Aparte das fraudes e os delitos de pornografía infantil na rede, entre as infraccións máis frecuentes atopan as que van en contra a propiedade intelectual e os ataques a sistemas informáticos.