O escenario foi unha rolda de prensa convocada pola patronal de empresas de electrónica, tecnoloxía e telecomunicacións, Aetic, para cuestionar a intención do Goberno de crear unha taxa do 0,9% dos ingresos das operadoras de telefonía para sufragar a desaparición da publicidade na televisión pública.
Un día antes de que o Consello de Ministros aprobase a proposta, e o presidente da patronal, Jesús Banegas, sacou toda a artillaría. Falou da carga fiscal que soporta o sector, da arbitrariedade e inxustiza da medida e das posibles consecuencias da súa aplicación. En concreto, citou tres: subas de tarifas para compensar o aumento dos custos, reducións de persoal nas empresas afectadas e/ou recorte de investimentos.
A asociación de consumidores Facua estudou as declaracións de Banegas e detectou a posibilidade dunha conduta prohibida pola lei de competencia. "As afirmacións do presidente de Aetic supoñen unha recomendación colectiva ao sector das telecomunicacións para subir prezos, o que pode producir o efecto de restrinxir a competencia", asegura Facua.
E é así, explica Rubén Sánchez, voceiro da asociación, tanto se as operadoras deciden aplicar un incremento aos seus prezos coma se non o fan, abonda a recomendación. Tampouco importa se as declaracións se fixeron con resignación ou como ameaza o Goberno para que cambiase de opinión, engade Sánchez, porque Banegas é o presidente dunha patronal e o seu comportamento debe cumprir coas leis que lle afectan.
Non foi así neste caso, segundo Facua, que considera que Aetic incorreu nunha conduta prohibida polo artigo 1 da Lei de Defensa da Competencia, que rexeita "todo acordo, decisión ou recomendación colectiva, ou práctica concertada ou conscientemente paralela, que teña por obxecto, produza ou poida producir o efecto de impedir, restrinxir, ou falsear a competencia en todo ou en parte do mercado nacional".
Unha vintena de operadoras
É certo que o sector das telecomunicacións ten varias patronais, pero de Aetic forman parte vinte operadoras ou provedoras de servizos de telefonía e internet. Telefónica, Vodafone, Orange, Jazztel, BT ou Yoigo forman parte desa asociación.
E é esta composición aquela levou a Facua a que reunir recortes de varias noticias escritas tras a rolda de prensa de Aetic e redactar unha denuncia, que onte foi enviada e rexistrada na Comisión de Defensa da Competencia.
Agora, esta institución ten que decidir se abre un expediente informativo á patronal. Se o fai, a causa podería rematar en sanción para Aetic.
Esta patronal rexeitou onte facer declaracións sobre a denuncia interposta ou sobre as afirmacións do seu presidente.
Unha tarifa regulada por servizo como protección
A asociación de consumidores Facua ten poucas dúbidas de que a taxa que se impoñerá, se a lei segue adiante tal e como está formulada, ás operadoras de telecomunicacións para financiar TVE supoñerá unha suba de tarifas. Segundo o seu voceiro, as compañías mostráronse moi pouco propicias no pasado a reducir as súas marxes e repercutiron calquera incremento de custos nos prezos aos usuarios finais.
Por iso, a proposta de Facua para protexer os clientes é que o Goberno emule a Comisión Europea e fixe unha tarifa regulada para cada un dos servizos de telecomunicacións. Sería similar ao que fixo a CE co roaming, que permite que despois as operadoras teñan todas as tarifas que queiran.