Hai temporal no mundo dos informáticos. Decenas de miles de persoas que posúen un título de enxeñeiro informático -ou aquelas que están a estudar para conseguilo-, viron como as titulacións de Enxeñaría en Informática e Enxeñaría Técnica en Informática "caeron" das propostas de títulos que habilitan para o exercicio das diferentes profesións de enxeñeiros.
Como consecuencia diso, varios informáticos mobilizáronse e convocaron unha folga para o día 19 de novembro.
A orixe desta protesta sen precedentes está na decisión do Ministerio de Ciencia e Innovación (Micinn) de rexeitar unha proposición non de Lei na que se solicitaba contidos e competencias para a Enxeñaría Informática.
A iniciativa, presentada a finais do mes pasado polo deputado popular Jesús Vázquez, foi vetada por 19 votos (PSOE) en contra, 17 a favor (PP e BNG), e as dúas abstencións de CiU.
Segundo comentan no seu sitio web, esta decisión está baseada en que esta Enxeñaría, segundo sostén o Goberno, "non ten atribucións", así como que "a informática é unha materia transversal -malia os esforzos de regulación da profesión-, e polo tanto non debe de concentrarse nunha titulación concreta".
¿Que implicacións ten o que non apareza a informática no repertorio de enxeñarías? Segundo se queixa unha lectora afectada, "desaparecerá a Enxeñaría (técnica) en Informática", e "o título de Enxeñaría Informática non será homologable a ningún ao non existir correspondencia cos novos títulos". Ademais, "os títulos actuais non terán validez a nivel Europeo, terán a validez que as empresas lles queiran dar".
Máis de 200.000 persoas (entre titulados e estudantes) veranse afectadas por esta decisión, que ademais enfronta aos Enxeñeiros informáticos cos de Telecomunicacións, xa que estes que ven aumentadas as súas competencias a áreas como Internet, microprocesadores, arquitecturas de computadores, interfaces, usabilidade, seguridade, bases de datos, sistemas de información, programación e 'software', entre outras.
A día de hoxe existen 11 colexios de enxeñeiros informáticos e oito colexios de enxeñeiros técnicos en informática (todos autonómicos), así como asociacións naquelas comunidades que non permiten constituír un colexio profesional para a profesión, tal é o caso de Madrid.
Segundo datos do propio ministerio de Industria, os ingresos derivados do sector informático representan polo menos un 1,6% do PIB español.