A Consellería de Innovación e Industria suspendeu onte a reunión da comisión que avalía o concurso eólico poucos minutos despois do seu inicio, alegando un fallo no sistema informático. Fontes da Consellería de Presidencia, responsable dos servizos xerais da Xunta, aseguraron que ao longo de todo o día non se produciu ningún problema na rede informática de San Caetano. Outras fontes ben informadas, tanto da consellería coma do sector eólico, descartaron tamén que se producise fallo ningún nos ordenadores de Innovación. Segundo estas fontes, o departamento que dirixe Fernando Blanco viuse obrigado a dar esta desculpa despois de que lle resultase imposible concluír a lista de proxectos admitidos a trámite, que ía ser votada na cita de onte. Un voceiro de Industria afirmou pouco despois de concluír a reunión que a consellería non ía facilitar ningunha información sobre os traballos da comisión.
A mesa de valoración reuniuse ás 16.30 horas, tal e como estaba previsto. Tras ler a acta da sesión anterior, un voceiro de Innovación pediu desculpas ao resto dos membros da comisión e explicou que un problema informático imposibilitaba a entrega do listado de anteproxectos admitidos a trámite. Como a votación desa lista era o obxecto único da reunión, esta suspendeuse e emprazouse o comité de expertos ás dez da mañá de hoxe, cando previsiblemente se resolverían xa eses supostos fallos informáticos. A consellería solo entregou aos membros da comisión un listado dunha vintena de proxectos que quedaron excluídos por afectar á Rede Natura.
En realidade, Industria aínda non ten rematado o listado oficial de repartición. O luns, ás once da noite, técnicos do Inega aínda cotexaban información sobre a capacidade técnica de determinados proxectos. Segundo fontes do sector, aínda existen zonas en liza, con candidatos empatados, e estase a tomar a decisión definitiva segundo criterios de produtividade. Para iso é necesario coñecer a relación entre o tipo de aerogenerador de cada candidato e as medicións de vento, e facer unha simulación por ordenador que determine a viabilidade de cada proxecto. Onte os técnicos da consellería tiñan previsto pasarse toda a noite traballando na elaboración da lista definitiva.
A reunión tampouco serviu para que os membros das consellerías socialistas presentes na mesa tivesen acceso á documentación dos candidatos. Segundo a orde publicada no DOG o pasado 17 de marzo, Fernando Blanco debe asinar hoxe unha resolución. Nese caso, a mesa de traballo verá os proxectos vencedores e terá que votar sobre eles o propio último día do prazo. Fontes xurídicas explican, non obstante, que tamén podería determinar un aprazamento se llo/llelo pide a comisión. No seo da consellería existen partidarios desta posibilidade, pero a última palabra tena o conselleiro, que aposta por cumprir os prazos. A suspensión da reunión deu paso a un rosario de interpretacións tanto no sector enerxético como entre a clase política. Para o PP, a determinación de pospoñer ata hoxe o resultado do concurso eólico obedece a razóns políticas, que non técnicas. O voceiro popular de Industria, Bernardo Tahoces, entende que o BNG trata de dilatar ata o último minuto a concesión de muíños «para pisar ao presidente Touriño a noticia da convocatoria das eleccións», anuncio previsto para mañá. Mostrou o seu convencemento de que as consellerías socialistas de Política Territorial e Medio «están a poñer a proa» a algúns proxectos, e que as dúas ás do Goberno negocian porque dende departamentos dirixidos polo PSOE se poderían paralizar as autorizacións. «Estamos nunha primeira fase, pero logo hai que aprobar o plan e a declaración de impacto ambiental, onde podería caer algún proxecto».