A Fiscalía Xeral do Estado (FGE) subliña a necesidade de unificar criterios en todas as comunidades autónomas para loitar contra o aumento de delitos informáticos, mellorar a formación dos fiscais e crear un encargado desta materia en todas as fiscalías.
Estas son algunhas das medidas propostas na Memoria da Fiscalía de 2008 que destaca que os delitos informáticos con máis incidencia son os relacionados coa tenza e distribución de material de pornografía infantil e as estafas bancarias.
A Fiscalía suxire adoptar medidas destinadas a mellorar a formación dos fiscais nesta materia e a dispoñer dun encargado de delitos informáticos en todas as fiscalías, que sirva de enlace coa FGE.
Co obxectivo de establecer criterios uniformes no rexistro, a Fiscalía de Granada propón a elaboración dun catálogo dos tipos legais cuxa comisión estea relacionada coas novas tecnoloxías. "A delincuencia informática segue reflectíndose de forma moi diversa nas memorias de cada unha das fiscalías", recoñece esta fiscalía, unha realidade que atribúe á falta dun sistema estatístico eficaz.
Delitos complexos de probar
O principal delito informático é a tenza e distribución de material pornográfico no que aparecen menores de idade realizando actos sexuais explícitos entre si ou con maiores de idade.
Para a Fiscalía de Sevilla, a complexidade para probar un delito informático radica na dificultade de determinar a idade dos supostos menores, diferenciar a mera posesión da distribución a terceiros, ou a competencia territorial.
Sobre este último aspecto, a Fiscalía de Girona apunta que a pornografía infantil adoitan realizala persoas dispersas por España ou o estranxeiro pero que obteñen as imaxes dun mesmo servidor, o que provoca que moitos procedementos abertos sexan "simples desgallos" dunha macrooperación a nivel nacional.
O desenvolvemento tecnolóxico, segundo a Fiscalía de Álava, facilitou a obtención de imaxes mediante teléfonos móbiles, polo que se incoaron delitos por captación de imaxes en lugares como duchas e vestiarios.
A mensaxería electrónica, advirte esta mesma fiscalía, permite que pederastas adopten unha identidade ficticia para contactar con menores e obter, valéndose da inxenuidade destes, fotos ou vídeos íntimos, que logo colgan na rede ou serven para "exercer graves chantaxes sobre os menores".
'Phishing' e delitos bancarios
A estes delitos súmanse os relacionados coa utilización do correo electrónico para remitir mensaxes ameazantes, inxuriosos e coactivos, as infraccións vinculadas aos atentados á propiedade intelectual e a apoloxía do racismo e a xenofobia.
En canto aos delitos relacionados coa actividade bancaria, as vías máis habituais son o 'phishing', a obtención por diversos métodos dos datos bancarios do estafado, ou a obtención de datos das tarxetas de crédito da vítima para utilizalos en diversas transaccións a favor do delincuente.
Os responsables das estafas empregan 'muleros', encargados a cambio dunha comisión de abrir as contas, o que provoca que "a identidade do verdadeiro responsable permaneza completamente oculta ou difusa entre datos ou indicios que sitúan o seu paradoiro en países de Europa do Leste", explica a Fiscalía de Álava.
Internet xoga, segundo esta fiscalía, "un papel amplificador" dos efectos delituosos, "incrementado drasticamente as posibilidades de éxito do estafador".