O director xeral da Fundación Computación e Tecnoloxías Avanzadas de Extremadura (Computaex), José Luis González, mostrou a súa satisfacción polo recoñecemento internacional ao seu primeiro ano de funcionamento cun dos premios Itanium Innovation entregados en San Francisco (EUA).
José Luis González destacou que este primeiro ano estivo centrada en proxectos destinados "a lograr impacto máis no ámbito do social que no ámbito dos negocios".
González participou onte á noite na cidade norteamericana de San Francisco na cerimonia de entrega dos Itaniun Innovation Awards, os premios que concede cada ano a Itanium Solutions Alliance, un consorcio que agrupa grandes empresas transnacionais fabricantes de hardware ou desenvolvedoras de software.
Durante o acto fíxoselle entrega do premio que distinguía á fundación polo "Impacto Humanitario" dos proxectos realizados durante o último ano.
Nese período, a fundación que xestiona o supercomputador estremeño Lusitania contribuíu ao desenvolvemento de máis dunha vintena de proxectos relacionados fundamentalmente cos ámbitos do cambio climático, a saúde, a agricultura ou a economía da auga.
Para o director xeral de Computaex, estes proxectos "ilustran a grande actividade desenvolvida polo noso centro e a enorme contribución dos superordenadores no desenvolvemento de proxectos destinados a mellorar a vida dos cidadáns".
José Luis González destacou, non obstante, que a actividade do Lusitania tamén está orientada a prestar servizos de importancia para a empresa.
Segundo dixo, "non só é capaz de prestar servizos estratéxicos no ámbito da investigación científica, senón que dispón de máis de 300 terabytes de memoria en disco que lle confiren unha enorme capacidade para o almacenamento de información ou de aloxamento de servizos que as empresas poden ofrecer a terceiros".