Unha vez máis, nos últimos días distintos medios de comunicación botaron man da expresión "erro informático", ao reproducir as declaracións de responsables políticos, para encubrir a incapacidade das institucións e organismos de manter os datos dos cidadáns seguros, exactos e actualizados.
Nunha noticia aparecida o pasado martes, dia 12 de febreiro, nos xornais Faro de Vigo e La Opinión A Coruña, titulada Un error informático deja sin beca a decenas de universitarios con derecho a percibirla, ponse en evidencia que a responsabilidade é humana e que o tan usado concepto "error informático" resulta ser unha vía de escape para que alguén ou algo, neste caso o Ministerio de Educación, non asuma a responsabilidade que lle corresponde.
Noutra información publicada o pasado día 8 do presente mes na edición santiaguesa de La Voz de Galicia, unha concelleira apelaba tamén a un "error informático" para xustificar o impago das pagas extras aos bombeiros da cidade.
En conclusión, o CPEIG solicítalle aos medios de comunicación e aos responsables políticos que non desvirtúen o significado do concepto informático" e que, antes de cualificar un desatino con un ou outro adxectivo, analice se se trata dun erro con máis cariz humano ca informático. Así mesmo, o CPEIG manifesta a necesidade de xerar e manter confianza nos sistemas informáticos sempre que estean desenvolvidos e xestionados de forma correcta.