Parlamento Europeo non quere que se persiga aos internautas que descargan música e outros contidos culturais de forma masiva. Onte rexeitou, con 314 votos a favor e 297 en contra, un informe que propuña unha serie de medidas para penalizar a quen se aproveitan dos programas de intercambio de arquivos p2p (peer to peer) para acceder gratis á cultura.
A Eurocámara considera demasiado restritivas as medidas propostas para protexer os dereitos de autor e cre ademais que non son as adecuadas para combater as descargas. O texto pide que se recoñeza que, con Internet, "cambiaron de forma radical os modos clásicos de utilización dos produtos e servizos culturais" e considera "esencial" velar por un acceso sen obstáculos aos contidos culturais en liña, "por encima dunha lóxica puramente económica e comercial".
En calquera caso, os eurodiputados recordan que debe garantirse unha "remuneración xusta" para os titulares de dereitos e admiten que os ingresos derivados deles son "indispensables para a supervivencia das industrias culturais", pero sempre gardando un equilibrio cos dereitos dos internautas.
As medidas restritivas que se pedían no informe eran moi similares ás que queren aplicar en Reino Unido e Francia. Ambos os países aprobaron unha lexislación que permite o control por parte dos provedores de acceso a Internet (ISP) das descargas que fan os seus abonados e, a penalización ou, no seu caso, a desconexión para aqueles que utilicen de forma masiva os programas p2p como emule, Bittorrent ou Ares.
En España, as entidades de xestión queren que se aplique un modelo similar de vixilancia e corte de subministración. De feito, intentaron introducir sen éxito un artigo (o famoso 17 bis) na Lei para o Impulso da Sociedade da Información, tramitada en 2007.
As descargas non son delito nin piratería sempre que non teñan un fin lucrativo, segundo a doutrina da Fiscalía Xeral do Estado.