A sexta edición do Congreso de Videoxogos e Creación CIVE 2016 terá lugar a vindeira semana en Pontevedra entre os días 25 e 28. Dentro do evento, está previsto un maratón de desenvolvemento, unha game jam, que o CPEIG patrocina e no que actuará de xurado. 

No marco da game jam, os participantes deseñarán e desenvolverán videoxogos (Serius Games) que non só sirvan para entreter, senón que ademais poidan informar, formar, denunciar e simular. Cómpre lembrar que unha game jam é un evento que consiste no desenvolvemento rápido de videoxogos, onde os participantes se reúnen en pequenos equipos de xeito improvisado e espontáneo para desenvolver un proxecto nun período de tempo moi limitado, competindo uns equipos contra os outros.

Requisitos

A competición vai dirixida a todo tipo de programadores, deseñadores e artistas de videoxogos co requisito de que sexan maiores de idade. Os participantes deberán identificarse co DNI. Cada asistente deberá levar o seu propio ordenador para o desenvolvemento do videoxogo e tamén un saco de durmir ou similar para descansar na zona habilitada, así como a comida e a bebida que precisará. A organización do concurso subministrará a conexión a Internet mediante WIFI. Cada equipo estará formado por catro ou cinco persoas. O grupo pode estar constituído á hora de inscribirse pero tamén se pode constituír no tempo dedicado a tal fin ao principio do concurso.

Tedes máis información na ligazón https://cive2016creas2i.wordpress.com/game-jam/