Santiago de Compostela, 21 de xaneiro de 2014.- O presidente do Colexio Profesional de Enxeñaría en Informática (CPEIG), Fernando Suárez Lorenzo, participou onte, xunto coa secretaria xeral de Igualdade, Susana López Abella, e o alcalde de Valga, José María Bello Maneiro, na entrega de diplomas ás alumnas do Programa Rede-Emprende do municipio pontevedrés. Rede-Emprende en Igualdade é unha iniciativa que naceu froito da colaboración entre o Colexio e a Secretaría Xeral de Igualdade da Xunta de Galicia a prol da formación inicial dunhas 150 mulleres.
O programa, que nace como experiencia piloto, ofreceu unha serie de cursos que comprenderon asesoramento, formación e apoio a mulleres potencialmente emprendedoras, en busca de emprego e con ansias de formarse. O obxectivo é axudalas na posta en marcha ou modernización das súas empresas e na procura de emprego para fomentar a súa adaptabilidade e concorrencia no mercado actual. A iniciativa inscríbese no VI Plan Galego para a Igualdade entre Homes e Mulleres. Estratexia 2013-2015, da Secretaría Xeral de Igualdade.
Foron as colexiadas e colexiados do CPEIG quen se encargaron de impartir como expertos na materia formación e asesoramento en varios aspectos: iniciación a Internet e redes sociais; novas tecnoloxías e emprendemento; novas tecnoloxías e busca de emprego, e redes e transposición de experiencias.
20 horas de duración cada curso
Cada curso tivo unha duración de 20 horas, cun máximo de 20 alumnas en cada edición, e desenvolvéronse nas aulas existentes nos propios concellos ou a través da rede de aulas CEMIT, dependente da Xunta de Galicia.
Nesta primeira edición piloto formáronse mulleres nos seguintes concellos: Guitiriz, Quiroga, Leiro, Xunqueira de Ambía, Valga, Abegondo, Porto do Son, Tui, A Cañiza e O Carballiño.
Eixe do Plan Galego para a Igualdade
Rede-Emprende en Igualdade responde ao eixe 3 do Plan Galego para a Igualdade entre Homes e Mulleres, que busca "outorgar un maior protagonismo ás actuacións que contribúan a facilitar a autonomía económica das mulleres galegas, o que leva a fomentar o seu acceso ao mercado laboral, así coma o seu desenvolvemento profesional e a posta en valor da súa iniciativa emprendedora", consonte á Estratexia para a igualdade entre mulleres e homes 2010-2015 da Comisión Europea, que sinala o seguinte: "a independencia económica é un requisito previo para que mulleres e homes poidan controlar as súas vidas e teñan unha auténtica liberdade para elixir".