O Centro de Supercomputación de Galicia (Cesga) forma parte do cento de entidades recoñecidas polo Ministerio de Industria por seren pioneiras no uso do dominio ".es". O director xerente do centro, Javier García Tobío, recolleu o galardón o pasado martes, nun acto presidido polo ministro José Manuel Soria e enmarcado na conmemoración do 25 aniversario do ".es". 

O CPEIG xa lle tramistiu a García Tobío os parabéns por este premio, que se suma aos numerosos galardóns recibidos polo Cesga nos seus máis de 20 anos de traxectoria. Un deles recibiuno precisamente na VI Noite da Enxeñaría en Informática de Galicia, celebrada o pasado xuño, en recoñecemento ao vixésimo aniversario do centro.

Outras entidades galegas premiadas xunto co Cesga son a Compañía de Radio-Televisión de Galicia, a Xunta de Galicia e as universidades da Coruña, Santiago e Vigo.