Membros da Universidade de Santiago de Compostela (USC) reuníronse con representantes do CPEIG e das empresas do sector das Tecnoloxías da Información e da Comunicación (TIC) coa finalidade de que elas os asesoren na elaboración do plan de estudos do novo grao de Enxeñaría Informática, que se impartirá na universidade compostelá.
Á reunión acudiron responsábeis de empresas como R, Televés, Tecnocom, Coremain, Bren Entertainment, Caixa Galicia, Altia, Softtek, Imaxin Software, Finsa, IBM e HP, así como representantes da Consellaría de Sanidade. Durante o encontro, as empresas trasladáronlle á comisión da USC as que consideran necesidades formativas para os futuros graduados.
Ademais, a comisión redactora do plan de estudos conta coas achegas dun grupo externo de académicos formado por tres catedráticos das universidades de Granada, Complutense de Madrid e Castela a Mancha, todas elas con destacado prestixio na materia.