Pasar al contenido principal

A Facultade de Informática da Coruña acolle a ‘XXIX Olimpiada Informática Española’ do venres 4 ao domingo 6 de abril, organizada polo CPEIG e a UDC

OIE

No evento, recoñecido polo Ministerio de Educación como olimpíada científica, participarán os 41 mellores talentos en programación chegados de toda España

David Lago, do IES Pedro Floriani de Redondela, e Artai Isasi, do IES de Sar de Santiago, son os representantes galegos

A ‘XXIX Olimpiada Informática Española (OIE)’ celebrarase esta fin de semana na Coruña, organizada coa colaboración do Colexio Profesional de Enxeñaría en Informática de Galicia (CPEIG) e a Universidade da Coruña (UDC). 

O evento, recoñecido polo Ministerio de Educación como olimpíada científica, celebrarase do venres 4 ao domingo 6 na Facultade de Informática da Universidade da Coruña (FIC-UDC). Tras anos realizándose sempre en Madrid, a celebración desta olimpíada pasou a ser rotatoria na pasada edición, estreando este ano unha novidade máis que é a ampliación de estancia por parte das persoas participantes na cidade anfitrioa.

A olimpíada española, que se celebrará por primeira vez en Galicia, conta coa participación de 41 estudantes (36 mozos e 4 mozas) de todo o país, seleccionados entre os mellores talentos en programación. Trátase dunha competición de programación algorítmica destinada a estudantes de ensinanza secundaria e bacharelato de toda España. O seu obxectivo é fomentar o talento en informática e a resolución de problemas computacionais, preparando aos mozos e mozas para retos académicos e profesionais de alto nivel.

David Lago, estudante de 1º de bacharelato do IES Pedro Floriani de Redondela, e Artai Isasi, estudante de 2º de bacharelato do IES de Sar de Santiago, foron os gañadores da Olimpíada Informática Galega 2025 e os representantes de Galicia nesta competición estatal.

Programa da OIE 2025

Venres 4
17:30 horas_ Acto de benvida. Inauguración da olimpíada coa asistencia da vicerreitora de Estudantes e Empregabilidade, Mª José Lombardía Cortiña; e o presidente do CPEIG, Fernando Suárez.
18:00 horas_ Instrucións da organización
19:00 horas_ Proba do sistema. Laboratorios

Sábado 5
10:00 – 14:00 horas_ Concurso día 1. Laboratorios

Domingo 6
10:00 – 14:00 horas_ Concurso día 2. Laboratorios
15:30 – 17:30 horas_ Entrega de premios no salón de actos da FIC e clausura, na que intervirá o reitor da UDC, Ricardo Cao; unha representante do Ministerio de Educación; e o presidente do CPEIG, Fernando Suárez.

Entregaranse premios económicos aos dez mellores clasificados e dous premios para as mellores participantes femininas. Tamén se repartirán catro medallas de ouro, catro de prata e catro de bronce. Os catro primeiros clasificados compoñerán a delegación española que participará na Olimpíada Informática Internacional, que se celebrará do 27 de xullo ao 3 de agosto en La Paz (Bolivia).

Ademais de participar na competición, os estudantes realizarán o sábado pola tarde unha visita turística pola cidade.

A OIE 2025 está patrocinada por: Conferencia de Directores y Decanos de Ingeniería Informática (CODDII), Aula Escola Europea, Sociedad Científica Informática de España (SCIE), Ministerio de Educación, Formación Profesional y Deportes, Consejo General de Colegios Profesionales de Ingeniería Informática (CCII), Centro de Investigación en Tecnoloxías da Información e as Comunicacións de Galicia (CITIC), Turismo de Galicia, Cátedra Aldaba WIB, Bahía Software, Clúster TIC, Crowdstrike, DXC, Gadis e NTT Data, e conta coa colaboración da Deputación da Coruña e Turismo da Coruña.