A dedución de 400 euros no IRPF que o Goberno aprobou hai un ano para reactivar o consumo está a causar algún que outro rompedeiro de cabeza á hora de cadrar as nóminas e as prestacións da Seguridade Social. De feito, un erro no programa informático que difunde a Axencia Tributaria para calcular as retencións -e que xa foi emendado- motivou que uns 120.000 xubilados cobrasen 20 euros de máis de media nas súas pensións de xaneiro e febreiro, segundo confirmaron en fontes de Facenda.
Segundo informou a propia Axencia un día despois de publicarse que outro fallo vinculado á mesma axuda de 400 euros causou a emisión de 140.000 borradores da renda incorrectos, os afectados por este novo erro foron pensionistas que cobran entre 12.000 e 22.000 euros e que, no seu conxunto, deberán devolver os 4,8 millóns de euros que recibiron de máis neste período. Ou retiveron de menos, segundo se mire. O axuste realizarase de forma progresiva durante os próximos meses.
Para solucionar o erro, detectado a mediados de xaneiro e que xa está totalmente emendado, houbo que esperar ata a difusión dunha segunda versión do programa, que se empezou a distribuír a principios de febreiro. Este modelo informático úsase para fixar as retencións mensuais con cargo ao IRPF para que á hora de botar contas con Facenda ao final de cada exercicio, o resultado a devolver ou ingresar por este imposto sexa o máis próximo a cero posible.
Non obstante, a pesar de que a desviación nos pagamentos só se puido cuantificar nos pensionistas, tamén afectará a "unha pequena parte" dos asalariados que, segundo a Axencia, é claramente inferior ao 10% do total. Concretamente, afectou a un número indeterminado de traballadores por conta allea que cobran entre 12.000 e 22.000 euros e que, con sorpresa, viron como a súa nómina de marzo se reducía tras a aplicación da dedución do IRPF de forma correcta.
Non obstante, a Axencia asegura que "nin as entidades pagadoras de nóminas ou pensións, nin moito menos os traballadores ou pensionistas, teñen que realizar cálculo algún xa que a nova versión do programa regulariza de forma automática as posibles diferenzas nas retencións". Abondará con que as entidades apliquen as novas ferramentas de cálculo para que as retencións se fagan correctamente.