Os datos son para pensalo. Un fallo informático pode custar ás empresas entre 45.000 e 75.000 euros á hora. Mesmo, levado ao extremo, o custo final para unha gran corporación, con miles de empregados e millóns de usuarios, pode chegar a ascender a 7,5 millóns de euros nunha hora, para unha empresa de telecomunicacións, o sector máis impactado por este tipo de incidencias.
Detrás del sitúase o sector de brokers financeiros, no que a non dispoñibilidade dos seus sistemas durante 60 minutos pode reportarlle perdas de 4,8 millóns e as compañías de tarxetas de crédito, cuxa desfeita polo mesmo motivo rolda os 1,9 millóns de euros por hora inactiva. As compañías aéreas son outro sector moi sensible a este tipo de problemas e, por exemplo, Virgin sufriu 11 días de interrupción nas súas reservas por un problema nos seus sistemas operativos e rexistrou unhas perdas de entre 11 e 15 millóns de euros, segundo recolle un recente informe da firma Compuware, especializada en tecnoloxía do rendemento.
Aínda sendo o máis importante, o impacto económico non é a única consecuencia negativa deste tipo de situacións, xa que tamén afecta á produtividade dos seus empregados, á confianza dos seus clientes e mesmo á responsabilidade legal pola potencial perda dos datos.
Segundo a consultora Gartner unha empresa de entre 100 e 1.000 empregados sofre unha media de 140 horas anuais de inactividade por problemas informáticos e esta cifra aumenta se falamos de compañía de máis de 2.500 empregados, que superan o 40 por cento de perdas de oportunidades.
En canto á forma de detección destes fallos, Forrester Research, indica que o 74 por cento dos problemas é detectado polo usuario final, sen que as ferramentas habituais de monitorización as detecten, o que non deixa en moi bo lugar este tipo de solucións.