Unha proposta galega de nome "Intellixente" logrou o recoñecemento europeo fronte a medio milleiro de empresas do sector nas "Olimpíadas tecnolóxicas" que acaban de celebrarse en Londres. Trátase dunha solución para situar unha marca ou empresa nas redes sociais e foi ideada pola firma viguesa "2Mares". Esta plataforma representa o traballo dun equipo de cinco acodes durante dous anos e medio.
No marco dos xogos paralímpicos de Londres 2012, no parque olímpico e a TechCity de Londres celebráronse os StartUp Games, as olimpíadas de empresas tecnolóxicas europeas que o goberno británico organiza para atraer a Londres a empresas tecnolóxicas con alto potencial de crecemento de todo o mundo. Finalmente "Intellixente", a solución de 2Mares para servizos de atención ao cliente escalables en social media, resultou elixida os gañadores do concurso.
"É unha plataforma que conta cun cadro de mando en tempo real que pode ler directamente o que se está escribindo dunha empresa en redes sociais e tamén interactuar", explica o responsable de 2Mares, Enrique de Miguel. Entre os demandantes potenciais deste sistema -que xa conta con clientes en doce marcas españolas, segundo o empresario- están a peme, para mellorar as relacións cos seus clientes e "escoitar a súa voz". "A forma de relacionarse cos clientes cambiou de forma radical; se queres vender, agora mesmo hai que escoitar", advirte de Miguel. Por iso, entre as aplicacións do sistema está escrutar todo o que se di da marca que o contrata en facebook, twitter, LinkedLn, YouTube, blogs ou foros.
Tras un proceso inicial de selección ao que se presentaron máis de cincocentas empresas de vinte países, seleccionouse un conxunto de cento vinte empresas que competiron durante tres días mostrando os seus produtos e tecnoloxía.
A avaliación realizouse ou por personalidades da escena tecnolóxica londinese como o director de adquisicións de Google, investidores de JPMorgan ou Bloomberg Ventures e investidores e coaches seleccionados por UK Trade & Investment´s (UKTI´s), Tech City Investment Organisation (TCIO) e a organización StartUp Britain.
A empresa "2Mares" e o seu produto intellixente foron elixidos os dezaseis gañadores, que viaxaron nun autobús londiniense até o nº 10 de Downing Street, onde recibiron os distintos premios.
Segundo Enrique de Miguel, CEO de 2Mares, "ademais da satisfacción de obter este recoñecemento ao esforzo do equipo de 2Mares nos dous últimos anos de traballo, esta foi unha oportunidade excelente para dar a coñecer a nosa tecnoloxía e produto nun mercado como o de Reino Unido e establecer contactos que nos van a axudar no camiño de construír un produto global así como na internacionalización da nosa empresa e mercados".