O CPEIG intervirá na mesa redonda A futura Lei de Servizos e Colexios Profesionais, organizada pola Facultade de Informática da Coruña, o día 3 de abril. Será a través do seu presidente, Fernando Suárez Lorenzo, que estará acompañado de Ramón Bermúdez de Castro Olavide, decado do Colexio Oficial de Telecomunicacións de Galicia (COETG), e Carlos Nárdiz Ortiz, decano do Colexio de Enxeñeiros de Camiños, Canais e Portos de Galicia. Actuará como moderador Luis Castedo Ribas, catedrático da Facultade de Informática da UDC.
A futura Lei de Servizos e Colexios Profesionais atópase na recta final da súa aprobación e á espera do informe preceptivo do Consello de Estado para que o Goberno dea o seu visto e prace a un texto do que están moi pendentes os colexios e servizos profesionais. A nova norma ten como obxecto establecer os principios, bases e directrices precisos para garantir o libre acceso ás actividades profesionais e o seu libre exercicio, así como actualizar e completar a regulación das peculiaridades propias do réxime xurídico do colexios profesionais.
As implicación desta lei no ámbito da Enxeñaría serán obxecto de análise o día 3 de abril a partir das 12.30 horas no salón de actos da Facultade de Informática da Universidade da Coruña.