O Colexio Profesional de Enxeñaría en Informática de Galicia (CPEIG) entregou o pasado domingo un dos tres premios smart-Ideas, dentro do Smart Weekend que se celebrou na Coruña. Situm resultou a gañadora cunha tecnoloxía multi-sensorial de localización en interiores para smartphones que representa unha nova xeración respecto a outras solucións existentes baseadas en triangulación Wi-Fi. Foi a idea que, a xuízo do xurado do CPEIG, mellor reflicte o uso da tecnoloxía no campo da Enxeñaría Informática.
Francisco Javier Rodríguez Martínez, subdirector da Escola Superior de Enxeñaría Informática do Campus de Ourense e vogal do CPEIG, formou parte do xurado smart-Ideas. Pola súa banda, Juan José González Cid, secretario do CPEIG, foi o encargado de entregarlle aos representantes de Situm un cheque por valor de 300 euros.
O CPEIG foi un dos patrocinadores do Smart Weekend, que se desenvolveu durante os días 6, 7 e 8 do presente mes de xuño. O encontro reuniu actividades de ámbito tecnolóxico tanto no eido do lecer coma no do desenvolvemento.
Cunha cantidade inicial de 500 postos de rede-Lan e unha conexión de alta velocidade por cortesía de R, durante a Smart Weekend realizáronse actividades variadas dentro de tres apartados: smart-Dev, para fomentar as relacións entre os freelance da informática e o deseño coas empresas do sector; smart-Lan, co formato de Lan-Party , onde os usuarios poderán intercambiar información a través dun servidor de DC, participar en actividades, torneos de videoxogos e gañar premios; e, por último, o concurso smart-Ideas.